"بَعْد البَحَرْ" قصائد واغنيات في "بعد البحر"، الصادر عن دار راية للنشر، يقدّم الفنان العكيّ متعدد الاهتمامات والمواهب، خير فودي، بعض قصائده القديمة المعروفة مثل " لو شِربوا البحر" و"بيتي العتيق" وقصائد أخرى عرفها الجمهور على نطاق واسع بعدما أدتها فرقة "ولّعت" التي أسسها فودة عام 2002 في عكا، بالإضافة إلى نصوص جديدة كتبها خلال الفترة الأخيرة.

على بال مين ؟
صارلك شو سنين متخبي بهالعتمه
بتغزل لي حروف لتحيكلي كلمه
وانا صار لي دهور علقان بهالتنور
بوقع بالنار وبتعربش عالنور
وانت ساكنلي ببيتي المهجور
وطافي الفانوس لتنسيني حلمي
على بال مين ياللي بترقص بالعتمه ؟

انا حلمي كبير وبغطي هالعتمه
متل المصير المعلق على كلمه
وانا ماشي دروب
بهالدنيا اللي بالشقلوب
عايش ا لنهار وبستنى المكتوب
وانت سايقها سيدنا ايوب
فيلمك محروق وبدك تحرق فيلمي ؟
على بال مين يلي بترقص بالعتمه ؟

كلمات والحان: خير فودي

الحق قلبك
الحق قلبك اوعى تخلّي اليأس يهدّك
عيش نهارك قبل ما يسبق ويعدّك
هاي الدنيا بتطّمنلا وبتأمنلا
وناسها يا عمي بتحطلّك فار بعبّك
الحق قلبك
خط الرّجعه لازم ترسملو من الأوّل
وإن خلصت جُمعه عيدها يا عمي من الأوّل
وبقلب العتمه فتّح عينك أوّل بأوّل
احسن توقع بشباك الدنيا وتتشربك
الحق قلبك
أوعى مرّه توخد كل العيشه جدّ
فرح الدنيا والله يا عمي مالو قدّ
وهمّ الدنيا إعملوّ عحدودك حدّ
وافرد وجّك احسن بالأخر يتجعلك
الحق قلبك

كلمات والحان: خير فودي

الدّنيا بليره
عم تنباع الدّنيا بليره
وعم ترخص هالناس
وعم تصغر فينا الدوّيره
وبتضيّق الأنفاس
صرنا قشّه بهالدوّامه
وضعنا بين غشّ ولآمه
المظلوم صار بدوّ محامي
وعلق بوجعة راس

شوفوا كيف علقتنا علقه
بهالوضع التّعبان
عم مندور بقلب الحلقه
وبلحقنا السّجان
صرنا ندوّر على بوّابه
تطلّعنا من هالكآبه
وعم نهرب من حكم الغابه
منلاقي الوسواس

عم تنباع الدّنيا رخيصه
ودفّيعه ما فيش
والحكي صاير تخابيصه
والكلمه بتعنيش
رجعنا نحكي بنفس القصّه
مع عالم والله ما بخصّا
واللّقمه عم تقلب غصّه
والفلين رصاص

كلمات والحان: خير فودي

دبّرها
دبرها يا خي بمعرفتك
انت المسؤول اللي بتقدر
تفهم احوالي وعلى شفتك
كلمه تغير حالي الأغبر

صوّتلك وجبتلك حاموله اصوات بايدي
وقلتلك يا خي وعدتلك مشاكلنا وعبّينا جريده
بتقول حكّللي تحكللك ما عندي اظافر يا سيدي
اذا هيك الحال بتوسّللك دبّرلي شي خلقة اظفر
دبّرها
قاعد عالكرسي بتغزللّي كذباتك بالحكي الناعم
وانت اللّي بتمّك قولتلي انّك واقف معنا وداعم
ومش راح تتركنا للقلّه وراح تبني اسواق ومطاعم
ولا شفنا منّك قرشلّه ولا حتى المليم الاصفر
دبّرها

كلمات : خير فودي
الحان: ماهر خوري

زلوّك يا عنب
زلوّك يا عنب وقلبوا الدّاليه حطب
يرحم العزّ ولمّا كنت بسعر الذّهب
زلوّك .. زلوّك .. زلوّك يا عنب

يرحم ورق الدوالي
ال كان عايش بالعلالي
وبعدها بتخطر عبالي
القطوف ال عالطلب
زلوّك .. زلوّك .. زلوّك يا عنب

واسا بطّلنا نشوف
بهالعلالي قطوف
الدنيا ملاها الخوف
ومليت قلّة ادب
زلوّك .. زلوّك .. زلوّك يا عنب

كلمات والحان: خير فودي

السّمراء العربيّه
أنا السّمراء العربيّه
ولدت أنا للحرّيه
بدمائي تتجلّى القدس
امّا بعيوني العسليّه
تتراقص اصداف الشاطئ
ورمالٌ تعزف اغنيّه
فالموج قبيلة اجدادي
والبحر دياري الأبديّه
والسّور شهادةً ميلادي
والحارة مولد أحفادي
وسأبقى سأظلّ أنادي
ها أنا صبّاره ببلادي
حتى لو من دون هويّه
فأنا السّمراء العربيّه

فأنا التّاريخ إذا كُتب
بدواة القدر الذهبيّه
أرسم من روحي أمانيَّ
أعزفُ بنبضي حريّه
اشمخ كالجبل على الوادي
منتصباً كالنّور الهادي
فالعزّةُ نبتت بفؤادي
وسأبقى سأظلُّ أُنادي
ها أنا صبّارة ببلادي
وجذوري في ارضي هويّه
فأنا السّمراء العربيّه

كلمات:خير فودي
الحان:ماهر خوري

يا قدس
ميلت جنب الوطن وقلت لازوره
وسمعت جوات القلب آهات بيدوروا
وصلت جنب القدس ووقفت شي ساعه
وسمعت صوت البحر وصدفاته بيقولوا
يا قدس يا ام الوطن ملحاتنا حليوا
ومفتاح عايش زمن بقلوبنا ال مليوا
صرخات همس وشجن واسوارنا عليوا
من فوق حصن العدا وقلاعه وسوره
من عكا صوتي طلع
تا يوصل اسوارك
وهالشوكه راح تنقلع
من بابها ل دارك
وراح تنزرع ورده
بقلب قوارك
تينور فيكي الوطن
بزاتونه وزهوره
يا امي شبع الطفل حكايات عن ستو
يا امي بكفي قصص قوليلي مين انتو ؟
قولي تاعرف انا اكون وين كنتو
واقطف بايدي الامل واتمرجح بنوره

كلمات :خير فودي
الحان : ماهر خوري